قصيدة مـعجزة

بعد التحيه والتعب 

بعد الشياكه والأدب 

تسمح لي أدوق فنجان زيادة ف حضرتك ؟ 

طبعا أوي 

إيه اللي فيك ؟

تعبان ياشيخنا من الحياة

وعلاجي بس محبتك 

يا ابني الحياة أصلا كده 

سطرين غنا علي 100 ديوان صبر وعلل

باين عليك يادي الصبي قلبك عشق

 فعلا ياشيخ حبيت أوي 

وأنا قلبي أضعف م الورق

طب قول ورايا وسيب لسانك ليا أنا

 زيدوا المدد وكمان مدد يا أهل السيادة لده الولد

وكمان مدد علي قلب درويش اتولد 

علي 100 مدد علي عقل م الحب اتجلد

طوح في راسك زيد كمان ، فاضل شوطين

دمعت ليه ؟

أبدا مفيش أنا شفتها وسط البخور 

معقوله يا إبني عشقت نور ؟

خالص دي من جنس البشر 

طيب علاجك مش هنا 

لملم حاجاتك وارتحل 

أنا مش إله علشان أجيب لك معجزة !

قصيدة مـعجزة
للشـاعر : محمد عبدالله